Tiraakoomaan dhukkuba Ijaa daddarba kan baakteriyaa “Chlamydia Trachomatis” jedhamuun dhufuudha. Iji keenya dhukkuba kanaan takka badde/jaamte taanaan nuuf deebi’uu hin dandeettu. Kanaaf otoo sadarkaa baduu/jaamuu irra hin geenye dafnee yaalamuun barbaachisaadha.
Yeroo heedduu Tiraakoomaan ija keenya lachuu kan hubu ta’ee, mallattoon inni mul’isu ammoo:
- Ijji fi qolli Ijaa kan nyaaraa gadi jiru nama hoosiisuu fi gubuu.
- Cim’aan akka malaa jiru ykn akka furrii wol harkisu ija keenya irra jiraachuu.
- Qolli ija keenya haguugu i’ita’u
- Ijji ifa nu sodaachuu/ ifa laaluu dadhabuu
- Dhukkubbiin ija keessatti nutti dhagahamu
- Booda irra reefinsi qola ijaa irra jiru gara Ijaa as garagaluu.
- Tirakooman sadarkaalee gara garaa kan qabuufi hanga ija jaamsuu kan gahuu danda’udha.
Wantoota Tiraakoomaaf nu saaxilan:
- Qulqullina naannoo keenyaa eeguu dhabuu
- Qulqullina dhuunfaa eeguu dhabuu,
- Mana fincaanitti fayyadamuu dhabuun
- Akkasumas wantootni (fkn balfaa) ilbiisonni akka wal horan haala mijeessan, mana tokko keessa nama hedduun jirachuun carraa Tirakoomadhaan qabamu ol kaasu.
- Tirakoomaan ija dhukkubatte San tuutuqanii ija nama biraa tuquun, ilbiisonni ija nama dhukkubuu irraa gara nama ija biratti fiduun, wayaa ija dhukkubsattuun haxayataniin namni biraa harkaan tutuqee ijatti fiduun fa’a daddarba.
Maal haa goonuu?
- Qulqullina fuulaa fi harka keenya eeguu. Fuulaaf harka keenya dhiqachuudhan.
- Qulqullina naannoo keenyaa eeguu. Balfaan wal hormaata ilbisotaatif haala mijaawaa waan uumuuf naanno keenya balfa adda addaa irraa qulqullessuu.
- Bishaan qulqulluu ta’etti faayyadamuu. Qulqullina nyaata keenyas eeguu.
- Nama mallattoo isaa qabu yoo agarre mana yaalaa deemee akka yaalamu gorsa kennuufi.
- Sadarkaa dhukkubni kun irra jiru irratti hundaa’uun yaalli isaa qoricha liqimfamu ykn Opireeshinii garagaraa ta’uu danda’a.